Pemujur Sesebengkah Menua Bepanggai Ba Penyulut Nembiak ba Pelajar Sekula: Harden

SRI AMAN: Nembiak sekula nyadika pelasar pemansang enggau pemujur sesebuah menua, ku Menteri Muda Pemansang Menua Pesisir, Datuk Francis Harden Hollis.

Ku iya, ba dunya diatu, genap iku peranak menua tu patut ngembuan tikas pelajar ke tinggi ngambika ulih besemekih sereta ngisi peminta dunya, bediri sama tinggi lalu duduk sama baruh enggau mensia mayuh ba dunya tauka menua bukai.

“Nya alai, kena nentuka anak enggau rayat kitai manggai ba tikas dunya nya,inovasi enggau pemansang pelajar sekula dikemeratka belama ari taun ke taun,” ku iya.

Iya ke nyadi Menteri Muda Pengawa Berumah bejaku munyi nya lebuh ti nutup Program Pekit Sukaneka enggau pekit Nyura 2011 ke diatur Opis Penyerakup Bansa enggau Integrasi Nasional Bagi Menua Sri Aman begulai enggau Komiti Penyelaras Tabika Perpaduan Sri Aman ba Stadium Mini ditu, pagi ensanus.

Ku Harden, pemujur ti dijapai bala nembiak ukai datai kediri enti enda diiring sereta diajar bala pengajar. Ku iya penyakah enggau pengangkun bala pengajar, ukai semina ketegal batang pengawa aja laban kereja sida lebih ari nya.

“Ungkup kitai orang ke ari luar sekula tauka apai indai, pengawa pengajar nya semina ngajar aja tang sida ngiri nembiak enggau pengelandik bukai baka begulai enggau pangan diri, berandau, chara tauka begulai enggau mensia mayuh ngambika sida ulih ngidupka diri enti udah tembu belajar ila ,” ku iya.

Kelimpah ari nya ku iya, ngambika pengawa pengajar nya ngasi agi, apai indai anang manggaika semua tanggung pengawa ngajar anak sida ba pengajar aja tang apai indai nambah sereta negapka pekara ti diajar pengajar nya ba rumah.

“Ke bendar, apai indai megai tanggung pengawa ngajar sereta nentuka anak sida belajar ba rumah, chukup ari segi perengka guna, likun sereta lantang ba semua pekara tauka pengidup sida.

“Anak ti dikesayau sereta ngembuan perengvka guna ke chukup ukai semina ulih mujur ba pengidup tang mega enda mudah tekuing ngereja pengawa ti enda manah baka makai dadah, ensium gam, belumba enggau nadai pemendar sereta penusah rama ke bukai,” ku iya.

Sama enggau ngulu pengerami nya, Residen Bagi Menua Sri Aman Jonathan Lugoh, Pemesai Opis Pelilih Mit Menua Sri Aman Ismawi Salleh, Pemesai Penyerakup Bansa enggau Integrasi Nasional Bagi Menua Sri Aman Rickado Dolen sereta Temenggung Sii Toh Peng.

Seraban 180 nembiak Tabika Perpaduan Bagi Menua Sri Aman enggau ngambi bagi ba kededua pekit nya.

- UB