Roland Allen, Anak Bansa Penan Ti Ke-2 Bulih Degree Ari Unimas

KOTA SAMARAHAN: Universiti Malaysia Sarawak (UNIMAS) sekali agi mujur nempa nembiak ke graduate ari raban bansa Penan iya kedua kali, ensanus.

Roland Allen, 24, ari Long Main, Ulu Baram teulihka Bachelor Degree ba Kajian Komunikasi ti diterima iya ba pengerami Konvokasyen ti ke-15 UNIMAS ba bagi enggau hari ti kedua.

Taja pan diau jauh ba menua pesisir, tang pekara nya enda nanggul Roland nyapai juluk ati ngulihka degree.

Iya anak keempat ari tujuh iku diri menyadi lalu seiku-iku iya mega ke ngembuan pelajar ke tinggi enti diband­ingka enggau menyadi iya ke bukai ti sekula semina manggai ba pom lima.

“Diatu aku gawa ba sebuah kompeni luar lalu enti ulih dudi ila aku deka nyambung pelajar aku ngagai tikas ke tinggi agi,” ku iya lebuh ti berandau enggau pengarang berita tembu pengerami konvokasyen ditu ensanus.

Tambah mega ku iya, taja pan aku jauh ari kami sebilik tang nya mih ke nyadi peransang ngagai aku belajar enggau bebendar agi nyentukka ulih manggaika diri ba tikas nya.

“Ba menua aku din, arus telefon enda manah, lalu nya mih penusah aku deka bejaku enggau apai indai aku ke din (Long Main)…semina gambar sida aja dikena aku mampul pengerindu aku ba sida.

“Lebuh ti ngenataika diri kitu (UNIMAS) pejalai nya jauh amat sereta begunaka dua hari pejalai numpang bilun baru ulih datai ba Kuching ditu.

“Taja pia, pekara nya ukai nyadika penanggul ba aku teulihka pemujur” ku iya seraya madahka sesiku orang ke belajar nya patut ngembuan penyakah sereta pengeliat ati baru sida teu­lihka pemujur.

Apai iya, Allen Bong, 54 taun ke gawa bumai aja madahka, pemujur ti diulih anak iya nya deka nyadi pemujur besai ke sida se­bilik.

“Semina iya aja anak aku ke mujur manggaika diri da­tai ba tikas tu (Bachelor De­gree) lalu nya patut nyadika chunto ngagai bala menyadi iya ke bukai ngambika sida teulihka pemujur baka iya,” ku iya.

Indai iya Roland Lily Sakun, 55, ke ngintu ruang bilik sida berasai gaga endar ati enggau pemujur ti dijapai anak iya nya.

Nembiak ke terubah en­dar gradute ari raban bansa Penan UNIMAS iya nya Ezra Uda dalam taun 2003.

- UB