MIRI: Pelajar bansa Dayak sekula primari enggau sekondari ke bulih pemutus peresa A dalam semua mata pelajar ba peresa sekual perintah taun nyin tadi dilalau nganjung pom peminta sida ngagai Komiti Nyambut Hari Gawai Dayak Bagi Menua Miri kena ngulih Anugerah Pendidikan Gawai Miri.
Chairman Pengatur ke lalu nyadi Presiden Gerempung Bansa Dayak Bidayuh (DBNA), Kapten Bernard Idit madahka, ba bagi Sijil Tinggi Pelajaran Malaysia (STPM) deka nerima RM150, Sijil Pelajaran Malaysia (SPM) RM100, Penilaian Menengah Rendah (PMR) RM75 enggau Ujian Pemilaian Sekolah Rendah (UPSR) RM50.
“Anang muai awak tu laban kitai ka meri basa ngagai pelajar ke bulih pemutus peresa ti manah dalam mata pelajar. Kitai andal gelar tu ulih ngangkatka tikas pemujur enggau semangat sida dalam akademik, ku iya.
Tandu Bernard, pom peminta enggau poenerang ke silik tau telefon ngagai Benjamin Spencer nengah lumur 012-8719880.
Pengawa nyuaka gelar nya deka diatur berengkah ari pukul 9.30 pagi di Bintang Megamall kena 1 Mei.
Kelimpah ari nya, raban anak mit Dayak mega diperansang masuk pekit nero nyerumba pengawa nyambut Hari Gawai Dayak Bagi Menua Miri.
Pekit nya deka diatur kena 28 April di Bintang Megamall pukul 1 lemai.
Pekit nya dibagi ngagai tiga kategori iya nya Kategori A (6 taun ke baruh), Kategori B (Taun 1 – Taun 3) enggau Kategori C (Taun 4 nyentuk Taun 6).
Penerang ke silik bekaul enggau pekit nya ditanya ngagai Wilfred Mac nengah lumur 013-8261997 tauka Mattew Dominic (013-8377297).
Ba hari ke sama mega, kimpin nyali darah bisi diatur berengkah ari pukul 10 pagi ba palan ke sama.
- UB
No comments:
Post a Comment