Selangau Aruh Bisi Kolej Komuniti

Sitak nya bisi 8,000 iku nembiak ti begunaka pengelandik kena napi SCORE

SIBU: Kaban Kunsil Nengeri (ADUN) Tamin, Joseph Mauh Ikeh minta ngambika sebuah ari tiga Kolej Komuniti ke deka digaga ba Sarawak ditumbuhka ba sitak Selangau.

Mauh lebuh ditanya kemari madah, nyentuk kediatu sitak Selangau dipelabaka bisi 8,000 iku bala nembiak beumur 21 ngagai 45 taun.

“Enti sema kolej tauka sekula vokasyenal nya digaga ditu, aku andal bala nembiak sitak Selangau bulih latih pengelandik kena napi SCORE,” ku iya.

Tandu Mauh, pekara nya mega bisi dibantaika iya ba Aum Kunsil Nengeri (DUN) Ke-17 Renggat Kedua ke diatur ba hari ketiga aum nya.

Ba aum ke sebaka, Mauh mega madah iya bisi mantaika penemu ngambika raban pengereja pengawa enggau pemesai pengerai di Klinik Kesihatan Selangau, Selangau ditambah.

Ku iya, penyampau raban pengereja pengawa enggau pemesai pengerai diatu enda tetapika peminta sereta enda ulih gawa enggau manah ngagai mensia mayuh.

Bekenangka projek infranstruktur, Mauh ba aum DUN nya mega bisi minta ngambika projek ngaga jalai alun ulih dipejalaika enggau lengkas.

Tu nyengkaum ngaga Jalai Ulu Mukah/Nanga Kuo, Jalai Selangau/Rh Kudang enggau Jalai Oya/Pakoh.

Kelimpah enggau nya, Mauh mega ngarapka pengawa ngemanahka sebagi ari jalai alun berengkah ari pelilih Tapang nyentuk SK. St. Mark, Nanga Tamin dipejalaika enggau jampat.

Mauh mega minta perintah ngemanahka Jalai Sungai Gu nyentuk ke Rh Tinggi, Dijih, laban jalai nya bangat lichak enti sema musin ujan ngenyit nyadi.

Bejaku enggau silik, Mauh minta Opis Pengerara Api enggau Penyah Penusah (BOMBA) mega aruh digaga ngambika enda kelalu ngarapka bantu ari Sibu ti begunaka masa urung sejam datai ba Selangau.

“Nadai utai ulih diselamatka dalam timpuh sejam enti nganti BOMBA datai ari Sibu. Nya alai, pekara tu aruh diperatika perintah enggau silik,” ku iya.

Pia mega, iya ngarapka pengawa ngaga palan napis ai di Selangau enggau Stapang mega patut digaga enggau jampat ngambika rayat enda betapi enggau penanggul enda chukup bekal ai beresi.

- UB