KUCHING: Bisi 54 iku pelajar baru mujur ngerejister masuk ngagai Institut Teknologi Sarawell (ITS) ba atur pengawa ngerejister pelajar, bedau lama tu tadi.
Maya tu, ITS bisi nawarka tiga program diploma iya nya Diploma Pengajian Syariah,
Diploma Psikologi enggau Diploma Pengurusan dan Perkhidmatan Makanan Halal sepengalama tiga taun belajar nembuka kos nya.
Nitihku Ketuai Pemesai Eksekutif ITS, Tuan Haji Mohd. Jawi MatLayer Sulong, ITS bejalaika sistem empat kali ngerejister pelajar (intake) dalam timpuh setaun iya nya ba bulan Januari, April, Jun enggau September.
Tu pengawa ngerejister pelajar kali ke tiga ba bulan Jun lalu nangkanka tu ila ba bulan September. Mayuh agi bala pelajar ngerejister ba ITS datai ari serata menua Sarawak nyengkaum Miri enggau Bintulu,” ku iya.
Mohd Jawi bejaku munyi nya ba pengerami Minggu Haluan Siswa (MHS) institusi nya, apin lama tu tadi.
Pengerami nya besuluka jaku ‘Misi Utuh Pencetus Mahasiswa Unggul’, MHS meri tuju ngenataika penerang bekaul enggau akademik, atur pengawa kolej, ngurus pelajar, disiplin enggau aktiviti kokurikulum.
Ku tandu Mohd. Jawi, aktiviti nya diatur kena ngerapitka kaul ba raban pelajar ngambika sama ulih belajar enggau mujur.
ITS ba baruh anak kompeni Kolej Islam Sains Teknolgi (KIST) bepalan di Bachok, Kota Bharu Kelantan. Kolej swasta tu berengkah ditumbuh Disember 2010 lalu ngerejister pelajar keterubah iya diatur ba Januari 2012.
Bisi tiga kos renggat diploma iya nya Diploma Psikologi, Diploma Pengajian Syariah enggau Diploma Pengurusan dan Perkhidmatan Makanan Halal ditawarka. Dua kos diperambu dibuka jemah ila iya nya Pembantu Perubatan enggau Kesihatan Persekitaran.
Pelajar ke udah tembu sekula, apai indai, pengajar enggau mensia mayuh tau ngulihka penerang silik bekaul enggau
ITS nengah lumur 082-616323/223 tauka datai ke diri empu ngagai kolej ITS tauka ngelawa ruai siber http://www.sarawell.edu.my.
- UB, 28 Jun
No comments:
Post a Comment