IPTS dipinta ngenukuka kus besenipak enggau peminta makit kereja

KUCHING: Tiap institut pelajar tinggi peribit (IPTS) dipinta mansik dulu, sekalika kus ke disediaka nya senipak enggau makit kereja ke lama.

Menteri Pengintu Pengelantang, Orang Indu enggau Pemansang Ruang Bilik Datuk Fatimah Abdullah madah, nengah asil pansik nya IPTS deka nemu sekalika graduate nundaka peminta makit kereja.

Ku iya, chara nya mega deka ngaluska pengelemi ti bisi ngambika ulih nempa graduate bekualiti sereta diterima ba makit kereja.

“Aku minta semua IPTS nyengkaum Kolej SATT ngaga pansik dulu pengulih makit graduan sida ngambika ulih nemu persin graduan tauka produk ke tempa sesebangkah IPTS ke napi peminta makit kereja.

“Tu amat beguna laban nya pengadang enggau pengandal ati apai indai sereta perintah lebuh sesebengkah institut nyendiaka latih pengelandik ungkup anak sida lalu deka nuku 100 persin anak sida bulih pengawa pengudah tembu belajar,” ku iya.

Iya mansutka pekara nya lebuh bejaku ba pengerami konvokesyen Kolej SATT (Akademi Hospitaliti dan Pelancongan Saujana) ke-9 di Dewan Mersawa Lembaga Hasil Dalam Negeri ditu, kemari.

Nambahka nya ku iya, asil pansik nya mega ulih narit orang mayuh deka nampung pelajar IPTS nya empu.

“Nya nunjukka penegap produk ke ulih diasilka kitai, apai indai mega andal ati nganjung anak sida ba IPTS,” ku iya.

Kelimpah ari nya, Fatimah ngelalau graduate ngambika seruran nyikap diri ngena pengelandik bukai awakka ulih betapi enggau peminta makit kereja.

“Pekara nya dikemerat dalam ubah pelajar di menua kitai kena nempa mudal mensia bekualiti tinggi jemah ila,” ku iya.

Ba pengerami nya kemari, bisi 100 graduate ke nyengkaum ngambi setipikit enggau diploma nembuka pelajar sida.

Datai ba pengerami nya, Chairman Kolej SATT Datuk Abdillah Abdul Rahim, Ketua Pegawai Eksekutif (CEO) Kolej SATT Mohamad Nazri Abdillah, Pengarah Urusan Kumpulan Syarikat Persela Datuk Mohamad Safri Abdillah enggau ke bukai.

- UB