KOTA SAMARAHAN: Sepenyampau 520 iku raban graduate ba pekara pelajar peranak menua Sarawak ari Institut Pelajar Tinggi Perintah (IPTA) enggau Institut Pematih Pengajar Malaysia (IPGM) Tahun 2013 diberi awak ngisi penuduk puang ngajar ba sekula nengeri tu empu.
Menteri ba Opis Menteri Besai, Datuk Joseph Entulu Belaun madah, raban nya udah diinterbiu ngena chara penilaian khas sereta terus diberi surat mangku pengawa.
Perintah nengah Suruhanjaya Perkhidmatan Pelajaran (SPP) Malaysia udah ngenyampatka proses ngeluarka surat pangku pengawa ari ti nganti kelalu lama ngagai sehari aja, nya chunto ngemandakka proses mangku pengawa, ku iya.
Ku iya nengah chara tu, penanggul bekaul enggau isu suntuk pengajar ti nyadi di Sarawak mega ulih dikurangka.
“Seharitu (kemari) kitai ngaga seiti rikut, nengah SPP kitai udah interbiu lalu meri surat pangku pengawa ngagai 520 iku raban graduate ba pekara pelajar ari IPTA enggau IPGM ti nyengkaum 516 iku deka ngajar ba sekula Primari enggau Sekondari sereta empat iku di Kolej Komuniti enggau Politeknik di nengeri tu.
“Perintah nengeri Sarawak enggau aku empu bebendar meri penemu ngagai SPP ngambika penuduk puang ngajar di nengeri Sarawak sereta Sabah diisi sepenyampat ke ulih lalu (penuduk puang ngajar) diisi peranak nengeri tu empu (di Sarawak) enggau peranak menua Sabah (sekula di Sabah).
“Ngena chara tu kitai ulih ngurangka penanggul suntuk pengajar, mutarka isu pengajar minta pindah endur ngajar ke lalu ngurangka ungkus pindah ti dipelanja perintah, kelimpah ari kitai ulih ngena pengereja pengawa bepengelandik sereta bepenemu ari menua kitai empu,” ku iya dalam aum pengarang berita seraya madahka 520 iku nyengkaum ke nganti pengajar ti udah pinchin.
Dulu ari nya Entulu nyuaka Surat Tawaran Pelantikan Pegawai Perkhidmatan Peringkat Siswazah ngagai 520 iku graduate ba pekara pelajar ari IPTA enggau IPGM, ti diatur SPP ba DeTAR Universiti Malaysia Sarawak (UNIMAS) ditu, kemari.
Graduate ari IPTA enggau IPGM nya graduate ti tembu belajar ba renggat Diploma Peguruan Lepasan Ijazah (DPLI) sereta Guru Sandaran Tidak Terlatih (GSTT).
Bejaku baru, Entulu madah, taun baru (2014) urung 20,000 graduate ari IPTA enggau IPGM serata Malaysia.
“Tang taun baru ari penyampau nya semina 7,000 penuduk puang ngajar, lalu semua peranak menua Sarawak diambi ngajar di nengeri tu empu,” ku iya seraya madahka ba taun 2013 bisi 10,430 penuduk pengajar puang di serata Malaysia.
Sama bisi ngulu aum pengarang berita kemari, Chairman SPP Malaysia Tan Sri Dr. Zulkurnain Awang enggau Sekretari SPP Datuk Abu Bakar Othman, kelimpah ari Sekretari Perintah Besai Nengeri Sarawak Datuk Md Yahya Basimin enggau ke bukai.
Sumber: Utusan Borneo Berita Iban
No comments:
Post a Comment