“Raban nembiak ke masuk koperasi sekula deka teulihka pengelandik ke beguna ba penemu dagang.
“Raban tu deka nyadi ketuai ngulu koperasi ke bisi ba menua Sarawak jemah ila berindik ari peneleba ngintu koperasi sekula,” ku Jabu.
Raban tu mega deka ngembuan ati ti liat maya besemekih enggau orang bukai napi bemacham penanggul ba pengawa dagang jemah ila, tandu iya.
Ku iya, nengah koperasi sekula, ulah orang dagang ke liat ati sereta sabar ulih diadaka ke lalu nya meh ke beguna endar ba pengawa dagang.
Iya mega madahka atur kereja ke manah, lurus sereta enda ngemeratka diri empu deka nentuka koperasi teulihka pemujur tauka penguntung ke besai agi.
Menteri Muda Perengka Mensia Mayuh Sarawak Datuk Sylvester Entri Muran mansutka jaku tu ngarika Sapit Kepala Menteri Datuk Patinggi Tan Sri (Dr) Alfred Jabu bejadika pengerami Anugerah kualiti Koperasi Sekolah Nengeri Sarawak 2011 ba siti hotel ditu, kemari.
Ba jaku ke dibacha Entrie, iya madahka pemujur koperasi ulih mulaika pengelantang sereta penguntung ngagai raban koperasi kelimpah ari ngerembaika ekonomi enggau pemansang rama ngagai tikas ke tinggi agi.
Naka ka diatu 177 buah tauka 95 persin koperasi sekula sekondari udah direjista ba serata Sarawak ke diarika urung 214, 740 iku nembiak lalu ngembuan syer ba penyampau RM1.33 juta. Nitihka rikut ari SKM Sarawak semina 10 buah sekula aja ba nengeri tu ke bedau numbuhka koperasi.
Ba pengerami nya gelar Anugerah Koperasi sekula Gemilang 2010 pulai ngagai Sekula Sekondari Perintah (SMK) Jalai Oya Sibu Berhad lalu Francis Tan ari SMK Lubok Antu Berhad udah nerima Anugerah Pengajar Koperasi Sekula 2010.
SMK Lubok Antu Berhad mega udah dipilih nyadi pemenang lumur satu nerima Anugerah Kualiti Koperasi Sekula (asrama renggat B).
- UB
No comments:
Post a Comment