KUCHING: Nembiak ari menua tu patut diberi peluang masuk belatih ngajar dikena nyeliahka penyampau peminta bala pengajar ke majak nambah ditukar ari Sarawak ngagai menua bukai.
Ketuai Gerempung Pengajar Bumiputera Sarawak (KGBS), Ahmad Malie madah, enti udah tembu belatih sida rindu agi dipinta ngajar ba menua diri empu.
“Kami minta mayuh agi rayat menua tu diberi awak belatih ngajar udah nya gawa ba menua tu empu,” ku iya lebuh ti dikerandau Utusan Borneo ditu, kena Hari Lima tu tadi.
Iya bejaku munyi nya lebuh ke dipinta ngenang peminta 3,500 pengajar sekula primari enggau sekondari ari Sarawak ke minta tukar ngagai menua bukai ungkup bagi bulan Januari taun tu.
Penyampau nya enda setipak enti dibandingka enggau peminta pengajar ti deka ngajar ba Sarawak semina 231 iku aja.
Direktor Pengatur Sekula Pulai Hari (BPSH) Opis Menteri Pelajar Datuk Mazlan Mohamad madah, bala pengajar ari menua semenanjung ti baru dipaduka ngajar jauh ari menua diri baka di Sabah enggau Sarawak ngujungka sida agi kakang ati lalu minta silih.
“Semina kes pengajar ke ngidap penyakit kritikal sereta enda ulih diperubatka ba menua tu tauka pengajar ke bisi penanggul pengelikun ba endur gawa aja deka diperunding,” ku Mazlan.
Berebak enggau nya, Ahmad madahka, KGBS irau ati pekara nya deka ngenataika penanggul kelebih agi bekaul enggau kurang bala pengajar enti enda diputarka enggau manah ti tau nanggul proses pangawa ngajar sereta belajar.
“Ba penemu kami, pengajar ke endang asal ari menua tu tang gawa ba menua bukai tauka luar ari Sarawak lebih agi bedau bisi ruang bilik dipindah pulai kitu dikena nipak peminta pengajar ke minta pansut nya,” ku iya.
- UB
No comments:
Post a Comment