KPM Patut Ngaga Mayuh Agi Sekula di Sabah, Sarawak Kena Napi Pemayuh Nembiak

MIRI: Opis Menteri Pelajar Malaysia (KPM) patut ngaga mayuh agi sekula di menua Sabah enggau Sarawak dikena napi penyampau nembiak ke majak nambah ninting taun masuk sekula primari tauka sekondari.

Presiden Serakup Pengajar Sarawak (STU), William Ghani Bina madahka, udah datai ba maya raban ari opis menteri nya ninjau pengurang enggau perengkaguna ke bisi ba sekula menua pesisir.

“Ambika chunto, mayuh endar rumah sekula ba menua pesisir udah jai sereta patut dikemanah ngambika pendiau nembiak enggau bala pengajar likun agi,” ku iya lebuh bejaku ba aum media di Miri ensanus.

Ku iya, kelimpah ari isu kurang pengajar ba Sabah enggau Sarawak, opis menteri nya mega patut ngembuan langgur ngaga mayuh agi sekula laban penyampau nembiak majak nambah ninting taun ti ngujungka kelas ba sekula nyau dedat.

“Opis Menteri mega patut nyendiaka belanja dikena ngaga sekula kelimpah ari ngemanahka buding enggau perengka bukai ngambika nembiak enggau pengajar lantang agi belajar tauka ngajar,” ku iya.

Opis menteri pelajar patut berunding ngambi pengajar ari raban bansa Penan ke nemu agi sentang adat asal lebih agi ba menua pesisir tauka ulu entigis.

“Ngambi pengajar ari menua tu empu ulih ngurangka ungkus perengka pengangkut enggau isu pengajar ke minta pindah, tambah mega pengajar ari menua tu empu nemu jaku sereta adat asal menua tu empu enti dibandingka enggau ari luar menua Sarawak,” ku iya.

Nandu nya ku iya, berengkah ari taun tu, opis menteri pelajar udah ngambi urung 50 persin pengajar ari menua tu ngajar ba Sarawak tang mengkang bedau chukup lalu patut ditambah ngagai 70 persin dalam kandang dua taun ti deka datai tu ila.

“Sarawak mengkang bisi 200 iti pengawa puang nyadi pengajar ke patut diisi enggau lengkas dikena nambahka penyampau pengajar ke kurang ba  menua pesisir enggau kandang nengeri. Opis Menteri nya mega patut berunding maduka pengajar sementara nyadi pengajar tetap,” ku iya.

Berebak enggau nya, nembiak ke gradute ari Sarawak International Dynamic Management (SIDMA), suba dikelala enggau nama UNITAR) patut diberi peluang nyadi pengajar tetap.

“Orang ke ngembuan pelajar tang semina dipinta nyadi pengajar sementara aja, nya alai opis menteri pelajar patut meri sida peluang nyadi pengajar tetap,” ku iya.

- UB