Taja pen sida tu landik bejaku English sereta bisi degree ba pengawa ngajar tang enda dipilih
KUCHING:Nembiak ke belajar kus nyadi pengajar ba Institut Pelajar Tinggi Luar (IPTS) enda muntang teulihka pengawa ngajar ba sekula perintah enti dibanding enggau raban graduate ari Institut Pelajar Tinggi Perintah (IPTA) ke ngujungka sekeda IPTS enda lantang ati enggau atur Opis Pelajar Malaysia (JPM) tauka Opis Menteri Pelajar (KPM).
Chairman Kolej SIDMA Sabah enggau Sarawak, nyengkaum Universiti Tun Abdul Razak (UNIRAZAK) Sarawak, Prof Dr Mornie Kambrie madah ke diatu graduate ke udah pass ari palan pelajar nya sigi udah mayuh teulihka pengawa nyadi pengajar ba sekula perintah.
“Tang ba bulan Januari 2010 bisi memo ari JPM madahka sida iya semina ngambi graduate ke udah pass ari IPTA. Madu enda meh kami enda lantang ati,” ku iya madah lebuh dikerandau pemberita sepengudah pengawa Nyerah Baucar Bup 1Malaysia ti dipenyadika Sapit Menteri Sains, Teknologi enggau Inovasi ba palan paking kerita ba Kolej SIDMA enggau UNIRAZAK ditu, kemari.
“Bakani ku atur nya? Bala graduate kami enda landik pia? Enti sida iya enda landik, nama kebuah enda muai sida iya gawa, nama kebuah sida iya enda di ketuka.
“Nama kebuah suba Perintah ngambi sida iya gawa suba naka pemayuh ke di ambi? Tang diatu nyau lain munyi, ke semina madahka ngambi bala pengajar ke udah pass ari IPTA aja,” ku iya.
Atur baka tu enda betul, ku Mornie laban enti nitih semua program ke di ajar ba palan nya dikemendar ulih MQA (Perintah), lalu bala nembiak ke belajar dia pen diberi PTPTN ke sama penatai ari Perintah.
“Nama kebuah dalam (bidang) pengerai bala graduate ari swasta baka Masterskill, Masa, Asiana, semua diambi gawa ba sepital perintah? Laban sepital nya diempu perintah.
“Nama kebuah JPM ngaga kami tu baka anak tiri? Laban enti nitih, JPM tauka KPM sama Perintah. Perintah ke sama nya mega ke ngemendarka PTPTN, ke ngemendarka MQA,” ku iya.
Enti suba ku iya, graduate ke pass ari IPTS sigi di ambi ngajar belama, lalu semina diatu aja nyau bisi atur ngemeratka graduate ari IPTA aja, tang ukai ari IPTS.
“Tu ukai atur ke manah, laban enti nitihka baka di Sabah enggau Sarawak, lebih agi ba sekula menua pesisir ke kurang pengajar.
“Enti kami nulis surat madahka deka nganjung graduate kami ke endang pass dalam pengawa ngajar, sida iya selalu madahka graduate kami enda nitihka program ke patut lebuh maya belajar ba kolej suba lalu enda sebaka enggau IPTA,” ku iya.
Ku Mornie, iya bisi penerang ke ulih nyukung ba penyalah tu baka ke ba Sabah alai seiku pengajar graduate Undang-undang nadai ngembuan sebarang pengelandik dalam ‘Bachelor of Education’ tang ulih ngajar ba Sekula Sekondari Perintah (SMK), ku iya.
“Nadai penyalah graduate kami. Sida iya landik bejaku sereta nulis dalam English.
“Bala nembiak kami, iya nya anak Iban, Bidayuh, Orang Ulu ke mayuh belajar ba IPTS tu mayuh datai ari menua pesisir. Nama kebuah enda ngambi sida tu ngajar ba menua pesisir?,” ku iya ke kala betemu enggau Sapit Menteri Besai (TPM) ti mega Menteri Pelajar Malaysia, Tan Sri Muhyiddin Yassin dalam taun 2010.
Ku Mornie, TPM udah madahka iya deka mansik pekara tu tang datai ke diatu bedau meri timbal agi.
Iya nambah baru, baka graduate ari Universiti Perguruan Sultan Idris (UPSI), sida iya mega kala madah pasal pekara tu ke enda muntang ngiga pengawa sepengudah abis belajar ba university nya.
“Kitai tu 1Malaysia, baik nya swasta tauka perintah. Enti bisi graduate ke manah tau dikangau nurun interviu. Tu nadai sekali ngangau nembiak IPTS nurun interviu,” ku iya ke enda lantang ati ba atur baka tu.
- UB
No comments:
Post a Comment