KUCHING: Raban pengajar diansak nyeliahka diri ngambika enda kelalu nitihka ati sereta meri jaku ke enda manah ngagai perintah ba mua mensia mayuh, ku Sapit Menteri Pelajar Datuk Dr Wee Ka Siong.
Iya madah, sigi suah nyadi, alai sekeda pengajar mega bisi bejalaika pengawa kerani ba sekula, tang nya ukai kebuah sida iya tau bejaika opis pekara pelajar.
“Opis menteri pelajar sigi nemu raban pengajar kekadang diasuh mutar tauka ngaga keretas kereja, nya meh kebuah kitai maduka pemesai pekara pelajar ba genap pelilih menua ngambika ulih ngurangka tanggung pengawa pengajar.
“Pengajar patut nemu tanggung pengawa sida iya lalu enda patut bejaika opis menteri,” ku iya sepengudah randau begulai enggau ‘Lembaga Pengurusan Sekolah Bantuan Cina’ ditu, kemari.
Iya mansutka penerang nya lebuh dipinta nimbal kompelin raban pengajar ke madah kelalu mayuh kereja dilempaika ngagai seseiku sida iya nengah media.
Wee mega madahka, opis menteri enda kala meri mayuh tanggung pengawa ngagai raban pengajar ngelamatu.
Ku iya, penanggul ba atur komputer mega nyadika kebuah raban pengajar napi penusah nembuka kereja kerani ke diberi ngagai sida iya.
“Diatu atur teknikal nyadika penanggul ngagai kitai lalu kitai patut mutarka nya ari ke ngaga kompelin,” ku iya.
- UB
No comments:
Post a Comment