Pemujur Pengidup Bepun Ari Japai Pengawa Pelajar

MAYUH MACHAM KOS DI UNIVERSITI BISI DISEDIAKA: Gluma nerangka kos sereta atur masuk universiti.

KANOWIT: Leka sempama ke nyebut, ‘Enti deka melenti buluh aruh berengkah ari tubu’ ke bela mai reti; enti deka teulihka pemenuku pengidup anak jemah ila, penyiru sereta penengkeman iring sereta lalau apai indai sereta mega orang tuai patut berengkah ba renggat ke tumu.

Berindik ari tu, entara juluk sereta tampai Gerempung Bansa Dayak Sarawak (SDNU) ke deka meda anak Dayak terus maju bepun ari pemenuku pelajar ngambika jemah ila nembiak tu teulihka pengawa ke manah sereta ngangkatka pemujur pemisi enggau pengelantang ruang bilik.

Kena 21 Julai tu tadi, SDNU pampang Machan ngatur ‘Penerang Peransang’ ungkup 150 iku nembiak sekula ke deka ngambi peresa UPSR, PMR enggau SPM.

Pengawa nya mega disukung sereta digulu urung 80 iku apai indai nembiak sekula ke bela dibantu komiti SDNU pampang Machan.

Atur pengawa nya dipenyadika Menteri Pemansang Pengawa Rama, Tan Sri William Mawan Ikom.

Dalam teks jaku iya ti dibacha wakil iya, Mandal Presiden I, Anthony Banyan minta pampang SDNU terus ngatur pengawa kena ngangkatka penuku sereta pengelantang pendiau pengidup nitihka singkang pemansang baka ke diatu ba pelajar sekula.

Entara ijinsi perintah bukai ke bisi ngulu atur  nya, Opis Pengerai, Opis Antidadah Kebangsaan (AADK), kelimpah ari Kepala Pengajar SK Machan, Johnson Sendal, pengajar Abi ari kanowit, chairman SDNU pampang Kanowit ti meg nyadi pengatur ‘Penerang Peransang’ TR Bantan ak Yu, tuai rumah bukai, kunsilor sereta sekeda ketuai raban bansa ti ngelingi.

Gempung pengawa baka nya mega ku Mawan, deka ngangkatka semangat begulai ngereja pengawa entara kaban komiti SDNU.

Ngalih hari nya, pengawa nutup program dipenyadika Kaban Parlimen (MP) Kanowit, Datuk Aaron Dagang ti diarika Sekretari Politik ba Opis Kepala Menteri, Maurice Giri.

Pemesai bagi penerang SDNU, Ganchai Jinta madahka timbal ke diterima ari atur program tu chukup manah lebih agi ari nembiak sekula ke mayuh udah datai mendingka‘’.

“Kami nyadang urung 147 iku aja nembiak sekula ke datai, tang enda ngadang pemayuh nya nyau ngelui 150,” ku Ganchai lalu madah tu kedua kali ‘Penerang Peransang’ diatur di sitak menua nya.

Entara speaker ke bisi dibai bejaku ba program nya, Dr Gluma Saban ke bejaku pasal kos ke bisi disediaka di university nyengkaum madahka maya universiti ngambi nembiak, pengajar Mabong Unggang ari SMK Wira Penrissen ke mega lecherer ba Universiti Terbuka, ke ngenang baka ni nyadi ‘Nembiak Nyulut ba Pelajar’, baka ni ku ngulihka pemutus peresa ke mujur, enggau pengawa ke patut digaga nembiak udah abis peresa.

Kelimpah ari nya mega, seiku lecherer, Ganchai mega bisi mantaika jaku iya dalam pekara pelajar enggau jalai pengarap.

Pengudah pengawa nya, randau Indu Opis SDNU enggau SDNU pampang Macham mega bisi diatur nyerumba pengawa makai lemai di rumah sekretari SDNU pampang Machan, pengajar Simon Kuek.

- UB