Forum Bejuraika Penemu Pelajar Jaku Iban Ba Tikas Master & PhD Patut Chakah Diatur

TEPA: Jelaing dipasukka ‘Baju Burung Iban’ ke tepa maya atur pengawa nya

Semua raban bansa Iban ke ngembuan pemandai sereta pengelandik aruh begempung nyapai juluk nya

MIRI: Sapit Menteri Perengka Pengangkut, Jelaing Mersat madah, forum endur bejuraika penemu senentang Pelajar Jaku Iban ke dipelajarka ba tikas Master enggau PhD ba universiti di menua tu patut chakah agi diatur.

Iya bejaku munyi tu lebuh bejadika Tikas 1, Pelajar Lagu Iban KSSR ba Mega Hotel ditu malam Hari Empat minggu nyin kemari.

“Chakah agi ngemansangka Jaku Iban. Raban bansa Iban, lebih agi raban kitai ke ngembuan pemandai patut begempung kena nentuka juluk nya ulih japai.

“Pengawa ngegap sereta ngeringka jaku Iban ba nembiak rebak baru beguna amat ngambika sida nemu adat enggau jaku diri empu enggau menuku agi,” ku iya.

Jelaing ke mega Kaban parlimen Saratok meransang bansa Iban ke pepandai berandau sereta ngemujurka Jaku Iban dipelajarka ba tikas Master enggau PhD laban pekara tu enda kala dipejuraika bala lecturer sebedau tu.

“Forum nya nyadi pelasar ke pemadu manah endur bejakuka pekara nya laban  ari nya tadi kitai nrmu chara ngemansangka jaku nya” ku iya.

Jelaing mega muji pengawa ti dikereja Opis Menteri Pelajar Malaysia (KPM) ti ngemansangka Jaku Iban ngagai Tikas 1 ba sekula primari.

Urung 200 iku orang ke landik ba Iban ari serata menua Sarawak tu udah datai ke Miri ngulu bengkel Level 1 KSSR Iban Language Edutainment Materials Building Workshop ngelama Lima Hari sereta tembu kena Hari Empat minggu nyin kemari.

Bela bisi ngulu pengerami nya Sapit Direktor Unit Jaku Etnik KPM, Bagi Pemansang KoKurrikulum, Padng Luna enggau chairlady pengatur pengawa Patricia Ganing ke mega lecturer ba Universiti Pendidikan Sultan Idris.

- UB