Nembiak IPTS kus nyadi pengajar minta diperundingka perintah

Ulih: Ambrose Rirang

Utusan Borneo (Berita Iban) halaman 10, 18 Oktober 2012

BINTULU: Nembiak ti ngambi kus belajar nyadi pengajar ba sebuah institut pelajar tinggi luar (IPTS) ba menua tu mantaika serabana laban ti enda diambi masuk nyadi pengajar ba sekula perintah taja ikas degree ti dipenggi sida sama taraf enggau nembiak bukai ti ngambi kus sebaka ari institut pelajar tinggi perintah (IPTA).

Nicholas Igat Rekan, 26, mantaika penusah ti nuntung diri taja pan iya ngambi kus nyadi pengajar, tang nyentuk ke sehari tu iya bedau dikangau ngajar ba sekula perintah di menua tu.

“Bida iya kami tu ngambi kus ngajar ba IPTS, tang setipikit degree kami tu sigi diiktiraf sereta sebaka enggau degree kus nyadi pengajar nembiak bukai ari IPTA,” ku iya.

Nya alai ku Nicholas, nadai kebuah sida iya ti ngembuan setipikit degree kus nyadi pengajar enda ulih diambi ngajar ba sekula perintah.

Lu Hung Yung, 26, mega mantaika serabana ti sebaka lalu minta Opis Menteri Pelajar Malaysia (KPM) enggau Opis Pelajar Nengeri (JPN) berundingka jalai dikena mantu sida sereta ngambi sida nyadi pengajar ba sekula ti begunaka pengajar.

“Nyadi kami ti udah ngambi kus nyadi pengajar tu endang berasai enda lantang ati laban ti enda diambi gawa taja pen ngembuan setipikit degree dalam ngajar lalu pekara ti bansa tu balat ngenusahka ati kami laban lalu nadai teulihka pengawa nyadi pengajar nyentuk ke sehari tu,” ku serabana iya.

Mary Kim Soon, 26, mega berasai sinu sereta enda puas ati laban ti bedau diambi ngajar taja ngembuan degree dalam kus nyadi pengajar.

Ku iya, enti nitih nadai kebuah perintah enda ngambi sida ngawa laban sekula ba menua tu sigi agi begunaka pengajar.

“Suba perintah sigi bisi bedanji deka ngambi kami ngajar, tang diatu nyau lain munyi laban sida deka ngambi bala pengajar ti udah pass peresa ari IPTA aja,” ku iya nambah.

Nya alai ku Mary, iya sigi ngarapka perintah ulih mantu mutarka penusah ti nuntung sida enggau jampat laban sida sigi ngarapka diri ulih nyadi pengajar sereta mujur dalam pengawa ngajar laban nya meh tuju sida ti ngambi kus nagajar nya suba.