200 Pengajar Interim Diketuka Engka Ketegal Puntan Ba Intebiu Psikometrik

LUNDU: Urung 200 iku pengajar sementara lepas graduet ke nangi deka diketuka kunterik kena bulan Mac tu engka ketegal ari puntan intebiu psikometrik.

Menteri Pelajar Malaysia, Dato Mahdzir Khalid madah, penanggul nya engka laban pengajar sementara tu puntan ba intebiu psikometrik.

“Sekeda engka laban puntan ba intebiu psikometrik. Tang, tuju prosedur tu ngambika kitai ngembuan pengajar ke bekualiti.

“Enti kelia, asal kitai nya graduet bidang pelajar, tau nyadi pengajar tang diatu, enda agi baka nya laban agi bisi proses bukai ke patut dititih,” ku Mahdzir.

Iya madah munyi nya ba aum media pengudah bejadika Pengajar Regas 1 Malaysia: Pengajar Penempa Menua Renggat Nengeri Sarawak 2017 enggau Pengajar Biak 1 Malaysia ba Dewan SMK Lundu ditu, kemari.

Atur pengawa nya seiti ari program inisiatif dikena ngangkatka kualiti bala pengajar ba renggat sekula, pelilih menua enggau nengeri.

Ba pekara pasal otonomi pelajar di Sarawak iya nya nisbah 90:10 ke alai Perintah Nengeri bisi minta pengajar peranak Sarawak empu ngajar ditu laban sida lebih meretika adat di menua tu.

Ku timbal Mahadzir, Malaysia bisi sebuah komiti dikumbai Komiti Pelajar bechairmanka orang Sarawak empu deka beratika pekara tu.

“Diatu kitai enti bisi chalun ke engkeman nitihka atur Opis Menteri Pelajar (KPM), kami tetap ngambi orang nya, sida deka dianjung nyereta kus ba Palan Pematih Pengajar Malaysia (IPGM). Tang penanggul iya diatu, genap pengajar ke deka dianjung nyereta kus nya sigi ditapis KPM, kitai beratika subjek ke ulih diajar sereta nitihka atur KPM.

“Enti chalun nya endang patut lalu nadai setipikit ngajar, chalunnya deka dianjung ngagai IPGM di Sarawak ngambi nitihka atur KPM.

“Penanggul diatu, kitai napi suntuk pengajar, nadai orang minta lebih agi ba subjek Agama, Sains (Biologi, Kimia enggau Fizik). Kitai udah ngempuruka semua degree, berati berapa iku sida ke ulih dibai ngagai IPGM,” ku iya seraya meransang sida ti keran ngajar tau betanya ngagai Opis Pelajar Sarawak (JPS) empu.

Ba aum media nya mega, Mahadzir bisi madahka urung 369 buah sekula di menua pesisir di Sarawak agi ngena injin api.

“Pekara tu benung diperunding lalu JPS bekerejasama enggau Sarawak Energy Berhad.

“Ba pekara tu kitai beratika jalai grid. Enti pejalai grid nya besemak enggau sekula tauka enda jauh ari sekula, ngaga grid lalu nyambung ke sekula deka dikemeratka dulu,” ku iya.

Ba kategori sekula ke agi ngena injin api ku iya, bisi tiga kategori, iya nya sekula khas, sekula ke numbas penyeranta enggau sekula ke pemadu seranta meseti digaga jampat.

“Ke pemadu dikemerat ba taun 2017 urung 183 sekula ke balat rusak patut dikemeratka dulu.

“Kelimpah ari nya, bisi 69 buah sekula baru benung digaga nengah Langgur Pemansang Malaysia Lumpar Ke-10 (RMK10) datai ngagai RMK ke-11,” ku iya seraya muji Sarawak nyadi chunto ke ngembuan penyerakup di antara pupu bansa enda ngira pengarap.

Sama bisi datai Menteri Pengelantang Pendiau, Orang Indu enggau Pemansang Komuniti Datuk Fatimah Abdullah, Direktor Besai Opis Pelajar Malaysia, Tan Sri Dr Khair Mohamad Yusof, Kepala Sekretari MOE Dato Sri Alias Ahmad enggau pengari chalun PRK Tanjong Datu, Siti Rafidah Adenan.

Utusan Borneo, 14/07/2017