KUCHING: Palan penyaga anak mit, Taska Permata 1Malaysia Qaseh Laila II (TP1MQL) ke diungkup ke orang ke gawa ba opis perintah di Wisma Bapa Malaysia, Wisma Pelita enggau Kompleks Baitulmakmur ke digaga di ‘Golden Triangle’ nyendi Wisma Bapa Malaysia deka berengkah bejalaika pengawa ujung bulan Julai tu ila.
Menteri Pengelantang Pendiau, Indu enggau Pemansang Ruang Bilik (KKWPK), Datuk Fatimah Abdullah madah, palan ke beungkus RM348,784.00 nya deka dipejalaika Gerempung Indai Tunggal Sarawak (PITSA) nyendiaka ruang ungkup 25 iku anak mit nitihka umur lalu nitihka pemesai buka lantai.
Iya madah baka tu ba aum media, pengudah nyerahka kunchi taska nya ari Opis Pelilih Menua Kuching disua ngagai KKWPK ba Aum Kunsil Nengeri Hari Ke-Enam Penggal Kedua ba Kunsil Nengeri (DUN) ditu, ensanai.
Nyerumba pengawa nya mega, operator taska nerima chek geran bejadika taska nya penyampau RM162,000.00 ari Perintah Besai ke disua nengah KKWPK ngagai presiden PITSA, Salmah Ibrahim.
Sebedau tu PITSA kala muka TP1MQL I ke dipenyadi kena 16 March 2012 di No:10 Jalan Ridgeway, Off Jalai Ong Tiang Swee ditu.
Ku Fatimah, sebuah agi taska di Wisma Wanita mega dipelaba deka berengkah bejalaika pengawa ujung bulan Ogos taun tu.
“Pengawa ngemunka semua taska tu deka dibantu KKWPK. Pemun taska tu berat endar laban tu siti sistem sukung ke patut diberi ngagai raban indai.
“Raban indai seruran irau ati laban nadai orang ngibun anak sida enti sema kededua melaki-bini bela gawa,” ku iya.
Iya ngarapka agensi, opis menteri bukai deka sama nyendiaka taska ba endur gawa ungkup pengereja pengawa ba opis perintah.
“Kami mega deka nemu enti sema bisi ijinsi tauka kompeni luar bukai ke bisi muka palan nyaga anak mit tang nadai dipadah ngagai kami, ngambika proses ngerejister nya ulih digaga,” ku iya.
Kelimpah ari nya, palan baka tu mega deka meri penguntung ngagai indai tunggal ke deka ngangkatka ekonomi ruang bilik sida.
Sama bisi ngulu aum media nya, Menteri Muda KKWPK (Pelajar Pemun Anak Mit) Rosey Yunus, Sekretari Mendam KKWPK Rodziah Morshidi, Direktor Opis Pengintu Pengelantang (JKMS) Noriah Ahmad.
Naka kediatu, penyampau taska 1Malaysia di Sarawak manggai enam buah, iya nya Taska Penyayang 1Malaysia Bintulu, Taska Penyayang 1Malaysia Baji Jaya di Sarikei, Taska Penyayang 1Malaysia Rantau Panjang Sibu, enggau Taska Penyayang 1Malaysia Miri.
- UB
No comments:
Post a Comment