University College of Technology Sarawak (UCTS) Deka Ditumbuhka Ba Sibu

KUCHING: Sibu deka digaga nyadi palan pelajar ke beguna, lalu ukai pengawa ke ngakal rayat ke diau ba pelilih menua nya baka ke dipadah penyakal.

Menteri Perintah Pelilih Menua enggau Pemansang Raban Bansa Dato Sri Wong Soon Koh lebuh mantaika nyimpul jaku di Aum Kunsil Nengeri (DUN) Renggat Kedua ba hari ke-7 madah kebuah sebuah universiti tikas antarabansa Kolej Laila Taib (KLT), suba United College Sarawak (UCS) nyendiaka kursus diploma sereta singkang ke betul entara Palan Pelajar Tinggi (IPTA) napi peminta modal mensia ke majak beguna di menua tu.

Iya madah KLT seruran teulihka 95 persin modal mensia ari kolej nya, ti dipelaba ngembuan rikod IPTS ke beberita endar di Malaysia, ngambi diploma graduate ari kolej nya.

“Enti diperatika, mayuh graduate KLT diatu nyadi pengajar ba pekara ke ditelebaka sida, kelebih agi peneleba ke diambi maya nyambung pelajar di menua luar,” ku iya.

Iya nambah, diatu University College of Technology Sarawak (UCTS) deka ditumbuhka, kena nyukung ngelatih nembiak tauka modal mensia kena peminta SCORE, ke begunaka orang bepengelandik dalam teknikal enggau teknologi.

Wong madah baru, lebuh nya, parti penyakal betuaika Kaban Kunsil Nengeri (ADUN) Bukit Assek, Wong Ho Leng madahka iya ngelaluka berita nya tang munyika nyindir tauka enda arap.

“Tu utai munyi ke dipadah ADUN Bukit Assek, ke diambi aku ari lambar 20 ari Hansard, 18 Mei: ‘Menteri Besai madahka pengawa ngaga universiti deka belabuh digaga dalam bulan Jun, ke terang endar baka ke meri gula batu laban deka bepilih. Orang Sibu suah endar kena bula  Perintah BN….”

“Kami Perintah BN enggau raban BN di Sibu enda bula ba pengawa ke deka digaga tang ngemeratka pengawa pelajar sereta mutarka atur pemansang modal mensia nitihka peneka perintah,” ku iya.

Kolej Laila Taib ku Wong, deka meruan nyadi kolej nyendiaka kursus diploma. Lalu jemah ila, mayuh agi kursus deka disediaka.

UCTS deka nyadi kelaie ke enda sebaka nyendiaka kus degree enggau kus post-graduate, ke dibantu KLT.  “YB Bukit Assek jampat endar engkadah ba pemadah UCTS di Sibu. Hari siti, iya (Wong Ho Leng) madah ngagai pemberita deka ngemuntanka pekara tu jemah ila.

“Iya (Wong Ho Leng) madahka universiti teknologi semina nyendiaka kursus bekait enggau teknologi aja, lalu nadai kursus bukai baka Injinia, Arkitektur, Quantity Survey, Undng-undang enggau utai bukai,” ku iya.

Wong madah ADUN Bukit Assek enda patut enda nemu lebuh ngaga jaku munyi nya.

“Teknologi semina nama ke universiti nya aja baka Universiti Sains Malaysia di Pulau Pinang ke nadai nyendiaka kus Sains!

Kelimpah ari nya, Wong Ho Leng mega nanya nama kebuah enda ngaga universiti penuh aja ari ngaga universiti kolej?

“Jaku Wong Ho Leng munyi tu ngayanka iya enda nemu utai. Peminta tu sebagi ari peminta IPT baka ke digaga ba menua bukai laban palan pelajar ke baru patut di gaga nyadi Universiti Kolej dulu sebedau iya diangkatka nyadi universiti penuh.

“Enti pansik ba perengka guna udah chukup, baru nama kolej nya deka diganti laban tu entara bagi kualiti ke dipinta IPT. Tambah mega, nadai bida ba jaku Universiti Kolej tauka Universiti ba pengawa nyendiaka kus degree enggau kus dgree ‘post-graduate’.

“Bekaul enggau 2,000 ekar tanah ba (west bank) Sibu ke disemaya KTS ngaga sebuah universiti, aku ngarapka YB Bukit Assek, besabar. Ila nuan empu meda lebuh universiti nya digaga…Anang semina nganu, orang diatu bepenemu agi” ku iya.

- UB