KUCHING: Palan nyeridi anak mit (Taska) ti benung nganti proses pemendar tauka lisin deka ngena Surat Aku Pengerejister Sementara kena bejalaika taska.
Taja pia ku Menteri Pengintu Pengelantang, Orang Indu enggau Pemansang Ruang Bilik, Datuk Fatimah Abdullah madah, perambu ngena Surat Aku Pengereijster Sementara ulih dikena nganti pemutus tauka pemendar ari kabinet tauka Opis Menteri Pemansang Orang Indu, Ruang Bilik enggau Raban Bansa.
Iya madahka naka kediatu pekara nya benung diperunding laban deka ngambi penerang ari semua orang tauka ijinsi ti bekaul.
“Lisin tauka Surat Aku Pengerejister Sementara amat beguna, laban nya ti nukuka Taska nya likun endur apai indai ngajung anak sida.
“Nya alai sekali agi aku ngelalau apai indai, sebedau nganjung anak masuk Taska, pekara ti dikemerat iya nya nuku sekalika Taska nya bisi lisin tauka nadai, nya ngemeratka pengelikun enggau pengelantang anak,” ku Fatimah.
Iya mansutka penemu nya dalam aum pengarang berita pengudah baum enggau Kunsil Pemansang Pelajar Tumu Anak Mit Sarawak (MPAKS) ti kedua dalam taun tu, ke diatur ba opis iya diitu , ngalih hari ensana.
Berebak enggau tu lebuh ditanya kebuah sekeda Taska ti enda rejister, iya madah, ketegal palan endur numbuhka Taska enda nitihka atur pengelikun enggau pengelantang ti ditukuka BOMBA, Perintah Pelilih Menua (PBT), Opis Pengerai sereta Opis Pengintu Penglantang Raban Bansa (KEMAS).
Nya alai ku iya sebedau Taska ditumbuhka, oarng ti deka numbuhka Taska nya patut milih endur ti patut.
Kelimpah ari nya, lebuh ditanya penyampau Taska ti enda direjister, iya madah;
“Serata Sarawak naka kediatu bisi 172 bengkah Taska bedau direjister.
“Taun tu tagit tauka Tikas Penyulut Pengawa (KPI) kami iya nya ngerejister 117 bengkah Taska. Ari penyampau nya diatu bisi 69 udah direjister lalu 48 bengkah taska benung dalam proses ngerejister,” ku iya.
Nitihka statistik Taska taun 2012, ba Sarawak ti direjister iya nya 112 bengkah Taska ke mungkur 2,186 iku nembiak enggau 346 pengibun.
Iya madah diatu pengawa ngerejister Taska semina dipejalaika dalam timpuh ti pandak iya nya tiga bulan enti dibandingka sebedau tu urung lima taun.
Penyampat enggau pemandak timpuh ngerejister Taska nya diatu berindik ari ‘One Stop Centre’ udah ditumbuhka ba Opis Pengintu Pengelantang Mensia Mayuh (JKM) serata Sarawak.
- UB, 27 Julai
No comments:
Post a Comment