Laban udah nendurka baru atur pengawa ngambi GSTT ba nengeri tu
kena mutarka penanggul suntuk pengajar
KUCHING: Perintah nengeri Sarawak beterima kasih ngagai Opis
Menteri Pelajar (KPM), ti udah nendurka baru atur pengawa ngambi Guru
Sandaran Tidak Terlatih (GSTT) di nengeri tu.
Menteri Pengintu Pengelantang, Orang Indu enggau Pemansang Ruang
Bilik Datuk Fatimah Abdullah madah, nya ulih mutarka penanggul suntuk pengajar
di nengeri tu.
Kitai enda tau ngelakka kelas nya nadai pengajar ngajar, ku iya.
“Pekara bekaul enggau GSTT udah teputar, sekula di Sarawak udah
dikemendarka ngambi baru GSTT dikena mutarka penanggul suntuk pengajar, nyentuk
ke KPM nganjung pengajar baru.
“Kitai beterima kasih ngagai Sapit Menteri Pelajar laban ti udah
meri penerang nya (GSTT),” ku iya ti diberi tanggungpengawa nyaga pekara
pelajar di nengeri tu.
Fatimah mansutka pekara nya lebuh dipinta meri penerang bekaul
enggau GSTT di nengeri tu, ba sebengkah aum pengarang berita ditu kemari.
Nitihku iya, taun nyin kemari nengeri tu nerima surat tesau ti
enda ngemendarka Opis Pelajar enggau sekula ngambi GSTT dikena ngisi penuduk ke
nadai pengajar.
Taja pia ku Fatimah, nengeri tu dikemendarka ngambi Guru Sandaran
Siswazah Terlatih (INTERIM) ti belajar Jurusan Pelajar ba universiti, ke bedau
dianjung ngajar ngagai tempat ti ditetapka opis menteri.
“Tang penanggul iya ditu bisi sekeda nya enggai ti ngujungka kitai
betapi enggau enda chukup pengajar sereta begunaka GSTT ngisi penuduk nya,” ku
iya.
Kelimpah ari nya Fatimah mega ngenang isu pengajar ngajar di
Sarawak patut peranak nengeri tu empu.
Kitai ngarapka pengajar ti peranak nengeri tu patut bejalaika
tanggungpengawa nyadi pengajar enggau engkeman, ku iya.
“Pekara ti amat beguna ditu, pengajar ti diambi ngajar enda tau
enda ti bekualiti ngambika ulih nempa mudal mensia ti bekualiti.
“Sida (pengajar) ke diambi ngajar nya amat tinggi komitmen enggau
nitihka penyulut lalu pengawa ngambi pengajar patut dikemeratka ari pun,” ku
Fatimah.
Nitihka statistik, penyampau pengajar ti peranak nengeri tu ke
ngajar di Sarawak bisi 32,044 iku pengajar ari pemayuh 41,499 iku pengajar
serata nengeri tu.
No comments:
Post a Comment