KAPIT: Seraban 170 iku raban Komiti Pemansang enggau Pengelikun Genturung Pendiau (JKKK) dalam sitak Parlimen Kapit udah nerima laptop 1Malaysia ari Komiti Penyambung enggau Multimedia Malaysia (SKMM).
Pengerami nyuaka laptop nya udah dipenyadika Kaban Parlimen Kapit Datuk Alexander Nanta Linggi ba Hotel Meligai kena Hati Minggu nyin tadi.
Nya mih semaya ti digaga Alexander nagagai genap iti JKKK ba sitak Parlimen Kapit.
Tu renggat ke terubah pengawa nyuaka laptop nya ngagai semua JKKK ba sitak Parlimen Kapit.
Lebuh ke bejaku Alexander madahka, pengawa nyuaka laptop nya nitihka semaya ti udah di gaga iya berindik ari peminta raban kos ke minta siti unit laptop ungkup sebuah JKKK lebuh iya ti bejadika Kos Nyadi Ketuai JKKK ungkup Zon Ili Rajang ti diatur ba Rumah Jeffery Nudong, Nanga Ibau, Batang Rajang kena 9 September nyin tadi.
“Nengah pemeri laptop 1Malaysia ti di beri perintah engagu pechuma nya, iya arapka mudah agi raban JKKK ngaga riput, minit aum, ngaga surat tauka ngena internet.
“Anang aja kita salah chara ngena perengka ICT ti disediaka nya,” ku Alexander.
Ku iya, enti dikena enggau manah mayuh penguntung diulih asil ari bekenaka perengka ICT dalam dunia moden baka ke diatu.
“Orang ke diau ba kandang negeri bekenaka internet nengah komputer ngatur mayuh macham pekara dalam pengawa dagang tauka meli tikit enggau mayuh macham guna ke bukai.
“Nya alai, nengah teknologi ke baka nya (ICT) mudah agi kitai bejalaika pengawa ngena chara digital,” ku iya.
Pemansang dalam bidang ICT mayuh udah mai ubah ba pemansang dunya kediatu, ku iya.
Ba perintah, nya mih siti ari tanggung pengawa sida ngambika sejalai enggau juluk 2020 deka nyapai status sebuah menua maju.
“Aku deka bebendar meransang bala ketuai raban bansa engagu ketuai mensia mayuh ngambika sida ngembuan pengelandik ba IT lalu ngemudahka sida bejalaika mayuh macham pengawa sereta nemu pemansang dunya negah penerang ke pemadu baru diatu,” ku iya.
Nyentukka diatu, raban SKMM udah meri 60,000 unit laptop ngagai bala nembiak ke patut nerima nyengkaum ngagai raban JKKK ba menua Sarawak ba renggat ke II.
Sama bisi datai, Sapit Direktor Opis SKMM Pelilih Menua Sarawak Radin Belayong, Pemesai Opis Pelilih Mit Menua Kapit Simon Japut Tiok, Sapit Residen (Pengawa Rama) Mohamad Ikhmal Abdullah, Sapit Tuai Kunsil MDK Kapit Kaunselor Jefferson Jamit, Ketuai raban bansa Pemancha Badi Nuawi enggau sekeda bala ketuai sereta pengari ari opis perintah.
- UB
No comments:
Post a Comment